Əvvəlki illərdə olduğu, kimi ötən ildə də Rusiyada daşınmaz əmlakın icarəsindən ən çox qazanan şirkət, əslən Azərbaycandan olan Zarah İliyev və Qod Nisanovun rəhbərlik etdikləri "Kievskaya ploşad” şirkəti olub.
Yeniavaz.сom xəbər verir ki, bu barədə məlumat dünyanın aparıcı nəşrlərindən olan "Forbes” nəşri tərəfindən hazırlanan "Rusiyanın daşınmaz əmlak kralları” adlı hesabatda yer alıb.
Hesabatda qeyd olunur ki, həmyerlilərimizə məxsus "Kievskaya ploşad” şirkətinin daşınmaz əmlakın icarəsindən əldə etdiyi illik qazanc 2 milyard dollar təşkil edib. Əvvəlki illə müqayisədə onların daşınmaz əmlakın icarəsindən əldə etdikləri gəlir 240 milyon dollar artıb.
Qeyd edək ki, bu gəlirlər onlara məxsus olan "Evropeyskiy” ticarət mərkəzi (180 min kvadrat metr) və "Fud siti” kooperativindən (1 039 min kvadrat metr) əldə olunub. Hazırda "Kievskaya ploşad” şirkətinin sərəncamında ümumi sahəsi 2 milyon 591 min kvadrat metr olan ticarət mərkəzləri, 148 min kvadrat metr olan ofis sahələri, 320 min kvadrat metr olan anbarlar və 1 550 otaqdan ibarət otellər var.
Məlumat üçün bildirək ki, Qod Nisanov 1966-cı, Zarah İliyev isə 1972-ci ildə Quba rayonunda (Qırmızı qəsəbədə) anadan olublar.
