Kənd Təsərrüfatı Nazirliyinin Qubada yerləşən Meyvəçilik və Çayçılıq Elmi Tədqiqat İnstitutunda mikrocalaq üsulu ilə yeni vegetativ calaq altıların alınması üzərində tədqiqat işləri görülür. Bu barədə ShimalNews 11 avqust tarixində Dünya TV-yə istinadən xəbər verir.
Mütəxəssislər bildirib ki, əldə olunan klon calaq altı formaları quraqlığa, xəstəliklərə və zərərvericilərə qarşı davamlı olur. Eləcə də onların üzərində yetişdirilən meyvə sortlarının məhsuldarlığı daha yüksək olduğu deyilib.
Biotexnologiya laboratoriyasında mikrokronal üsulu ilə çəyirdəkli meyvə bitkiləri (gilas, şaftalı, nektarin və badam), o cümlədən armud üçün nəzərdə tutulmuş calaq altılar çoxaldılır.
İlkin olaraq bitkilər qida mühitində əkilir və müəyyən hündürlüyə çatandan sonra istixanaya köçürülür. Burada onlar yenə də müəyyən hündürlüyə çatandan sonra sahəyə çıxarılır.
Açıq sahədə bitkilər avqust ayına qədər, yəni calaq mövsümü başlayana kimi yetişdirilir. Müəyyən hündürlüyə və qalınlığa malik olduqdan sonra artıq onlara calaq etmək olar.
Meyvəçilik və Çayçılıq Elmi Tədqiqat İnstitutunun elmi katibi Zəminə Sərhədova həmçinin bu calaq altıların əkilmə qaydaları ilə bağlı da məlumat verərək bildirdi ki, onların üstünlükləri daha sıx əkilməsindədir. Bununla da ənənəvi bağlar ilə müqayisədə daha çox məhsul əldə edilir.
Azərbaycanda il ərzində ümumilikdə 5 milyon ədəd tumlu və çəyirdəkli meyvə tinginə ehtiyac var. Tələbatın böyük hissəsi xarici mallar ilə ödənilir. Meyvəçilik və Çayçılıq Elmi Tədqiqat İnstitutunun yeni Biotexnologiya laboratoriyası yaradıldıqdan sonra yaxın gələcəkdə ölkəmizdə illik ting istehsalını 2 milyon ədədə çatdırmaq məqsədi qoyulub. Bu da, böyük ölçüdə ting idxalının qarşısını alacaq.
