Quba rayonunda iki aydan artıqdır alma satışında ciddi sıxıntı yaşanır. Mövcud vəziyyət tonlarla məhsulun xarab olma təhlükəsi ilə üz-üzə qalmasına səbəb olub.
Shimal.News-a danışan yerli fermerlərin sözlərinə görə, yaranmış çətinliyin əsas səbəbi Rusiya Federasiyasında alıcılıq qabiliyyətinin aşağı düşməsidir.
Bildirilir ki, son dövrlər qonşu ölkədə baş verən iqtisadi proseslər ixracın kəskin zəifləməsinə gətirib çıxarıb.
Nəticədə soyuducu anbarlarda tonlarla alma satıcı gözləyir. Fermerlər bildirirlər ki, satışın ləngiməsi xüsusilə kiçik və orta təsərrüfat sahiblərinə ciddi maddi zərbə vurur. Məhsulun saxlanma müddətinin məhdud olması isə əlavə risk yaradır.
Mütəxəssislər hesab edirlər ki, problemin həlli üçün alternativ ixrac bazarlarının tapılması vacibdir. Onların fikrincə, yeni bazarlara çıxış imkanları genişləndirilməsə, növbəti mövsümdə istehsal həcmi də azala bilər.
Qeyd edək ki, Qubada ümumilikdə 7 min hektara yaxın alma bağı mövcuddur. Ötən il bu sahələrdən 106 min tondan artıq məhsul tədarük olunub. Rayon ölkədə alma istehsalının əsas mərkəzlərindən biri hesab olunur.
