Uzun müddətdir Shimal.News nəzarətində saxladığı Quba Rayon Mərkəzi Xəstəxanasında gecikən əməkhaqqı problemi nəhayət həllini tapıb.
Dünən axşam saatlarında tibb işçilərinin gecikən maaşları kart hesablarına köçürülüb. Bununla da fevral ayına aid ödənişlərini ala bilməyən yüzlərlə əməkdaşın üzü güldü.
Dünən, martın 17-si olmasına baxmayaraq, təxminən 1500-ə yaxın işçinin maaşını ala bilmədiyi barədə xəbəri dərc etmişdik. Halbuki əmək müqavilələrinə əsasən ödənişlər hər ayın ən geci 10-dək həyata keçirilməlidir.
Maaşların məhz Ramazan və Novruz bayramına sayılı günlər qalmış ödənilməsi işçilər arasında müəyyən rahatlıq yaratsa da, gecikmənin özü ciddi narazılıq doğurub. İşçilər bayram ərəfəsində maddi çətinliklərlə üzləşiblər.
Qeyd olunur ki, problemin kökündə maliyyə idarəçiliyi ilə bağlı çətinliklərin dayandığı iddia edilir. Ötən ilin noyabr ayında müəssisənin baş mühasibi Elşən Babayev vəzifəsindən azad edilib və həmin dövrdən sonra maaş gecikmələrinin başladığı bildirilir.
Məsələnin həll olunmasına baxmayaraq, bu cür halların təkrarlanmaması əsas gözlənti olaraq qalır. Ümid edilir ki, gələcəkdə tibb işçiləri əməkhaqlarını vaxtında alacaq və oxşar problemlər bir daha yaşanmayacaq.
