Kənd Təsərrüfatı Nazirliyi yanında Aqrar Kredit və İnkişaf Agentliyi (AKİA) tərəfindən Quba, Qusar və Xaçmaz rayonlarında fəaliyyət göstərən müasir kənd təsərrüfatı təsərrüfatlarına mediatur təşkil edilib.
Səfər çərçivəsində media nümayəndələri intensiv meyvə və fındıq bağları, aqroturizm mərkəzləri, soyuducu anbar kompleksi və heyvandarlıq təsərrüfatları ilə tanış olublar.
İlk dayanacaq Quba rayonunun II Nügədi kəndində yerləşən "Kənd İnn" Aqroturizm Mərkəzi olub. Bildirilib ki, burada dövlət dəstəyi ilə yaradılmış intensiv alma bağları ilə yanaşı, atçılıq, heyvandarlıq, quşçuluq, balıqçılıq və tərəvəzçilik istiqamətlərində də fəaliyyət göstərilir. Qeyd olunub ki, aqroturizmin inkişafı bölgədə məşğulluğun və kənd turizminin genişlənməsinə töhfə verir.
Qusar rayonunda fəaliyyət göstərən "Aqrovest" MMC-də isə bildirilib ki, müəssisənin 356 hektar meyvə bağı var və hər il bu bağlardan təxminən 9 min ton məhsul əldə edilir. Bağların salınması və müasir suvarma sistemlərinin qurulması zamanı dövlət subsidiyalarından və 40 faizlik güzəştlərdən istifadə olunub.
Mediatur iştirakçıları həmçinin 5 min ton tutuma malik müasir soyuducu anbar kompleksi ilə tanış olublar. Burada məhsulların keyfiyyətinin qorunması üçün şoklama və çeşidləmə avadanlıqlarından istifadə edilir.
Daha sonra nümayəndələr şimal bölgəsində 600 hektardan çox fındıq bağına malik "Agrarco" MMC-nin təsərrüfatına baş çəkiblər. Burada yerli və İtaliyadan gətirilmiş fındıq sortları becərilir. Yeni bağların salınmasında da dövlət dəstəyi və güzəştli suvarma proqramlarından yararlanılıb.
Səfərin son ünvanı Xaçmaz rayonunun Yalama qəsəbəsində yerləşən ölkənin ilk aqroparkı – "Yalama Aqropark" MMC olub. Məlumata görə, müəssisədə hazırda 2 500 baş "Simmental" cinsli iribuynuzlu heyvan saxlanılır. Burada illik 110 ton ət və 10 min ton süd istehsal olunur. Müəssisə rəhbərliyi heyvanların alınması üçün 60 faiz, texnika və avadanlıqlar üzrə isə 40 faizlik dövlət güzəştlərindən yararlandıqlarını bildirib. Bu dəstəyin istehsalın genişləndirilməsinə və yeni investisiyaların cəlbinə mühüm töhfə verdiyi qeyd olunub.
