Qəbələ Beynəlxalq Hava Limanının regional aviasiya mərkəzinə çevrilməsi üçün yeni imkanlar nəzərdən keçirilir. Bu, gələcəkdə Qəbələdən Avropanın müxtəlif şəhərlərinə birbaşa uçuşların həyata keçirilməsinə şərait yarada bilər.
Nəqliyyat eksperti Eldəniz Cəfərov bildirib ki, Qəbələ hava limanının regional aviasiya mərkəzinə çevrilməsi istiqamətində artıq praktiki addımlar atılır.
Onun sözlərinə görə, bununla bağlı bir neçə aviaşirkətlə danışıqlar aparılır və hava limanının regional hub kimi istifadə imkanları qiymətləndirilir.
Ekspert Qəbələnin Türküstan və Kutaisi hava limanlarının tətbiq etdiyi regional aviasiya modelləri əsasında inkişaf etdirilməsi imkanlarının da nəzərdən keçirildiyini deyib.
Cəfərovun sözlərinə görə, bu layihənin reallaşması Qəbələnin beynəlxalq əlçatanlığını artırmaqla yanaşı, bölgəyə xarici turist axınının genişlənməsinə də imkan verə bilər.
O bildirib ki, 2026–2030-cu illər üçün turizmin inkişafına dair Dövlət Proqramında hava nəqliyyatının turizmə töhfəsinin artırılması ilə bağlı təkliflərin hazırlanması da nəzərdə tutulub.
Beləliklə, gələcəkdə Qəbələdən xarici ölkələrə, o cümlədən Avropa şəhərlərinə birbaşa uçuşların açılması bölgənin turizm imkanları baxımından mühüm dəyişiklik yarada bilər.
Mənbə: Avtosfer.az
