Son aylarda müşahidə olunan leysan yağışlar, sel, subasma və dolu hadisələri Azərbaycanın şimal bölgəsində kənd təsərrüfatına ciddi zərər vurub.
Shimal.News xəbər verir ki, Aqrar Sığorta Fondunun məlumatına görə, may ayından etibarən ölkə üzrə 53 min hektara yaxın əkin sahəsi ilə bağlı zərər müraciəti daxil olub. Bunun böyük hissəsi taxıl sahələrinin payına düşür.
Fondun İdarə Heyəti sədrinin müşaviri Rəvan Səmədli bildirib ki, ən ağır fəsadlar məhz ölkənin şimal rayonlarında qeydə alınıb.
Belə ki, son aylarda Qəbələ rayonu, Qax rayonu, Şamaxı rayonu və İsmayıllı rayonunda baş verən sel və dolu hadisələri yüzlərlə fermer təsərrüfatına ziyan vurub. Şəki-Zaqatala iqtisadi rayonunda da kənd təsərrüfatı sahələri ciddi itkilərlə üzləşib.
Məlumata görə, təbii fəlakətlər nəticəsində 51 min hektara yaxın buğda və arpa sahəsi, eləcə də təxminən 2 min hektar meyvə bağı zərər çəkib.
Xüsusilə yaz aylarında ardıcıl yağan yağışlar, çaylarda su səviyyəsinin qalxması və dolu hadisələri fermerlərin aylardır çəkdiyi zəhməti təhlükə altına qoyub. Bir sıra rayonlarda meyvə bağlarında məhsul itkisi, əkin sahələrində isə məhsuldarlığın azalacağı gözlənilir.
Hazırda Aqrar Sığorta Fondunun ekspert qrupları müxtəlif bölgələrdə zərərin həcmini müəyyənləşdirir. Qiymətləndirmə başa çatdıqdan sonra sığortalı fermerlərə ödənişlərin həyata keçirilməsi nəzərdə tutulur.
