Qax rayonunda ənənəvi kənd təsərrüfatı sahələrindən olan fındıqçılığın inkişafı istiqamətində işlər davam etdirilir. Son illər rayonda 3 min hektardan çox sahədə yeni fındıq bağları salınıb.
Shimal.News xəbər verir ki, Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimovun sözlərinə görə, yeni salınan fındıq bağlarının 742 hektarı damcı üsulu ilə suvarılan intensiv bağlardır.
Hazırda Qax rayonunda mövcud fındıq bağlarının ümumi sahəsi 10 min 97 hektar təşkil edir. Bu bağların 6 min 255 hektarı barverəndir.
Rəsmi məlumatlara görə, ötən il rayonda fındıq bağlarından 5 min 124 ton məhsul tədarük olunub.
Fındıqçılıq Qax əhalisinin əsas gəlir mənbələrindən biridir. Bu səbəbdən də torpaq mülkiyyətçiləri məhsuldarlığı artırmaq üçün bağlarda aqrotexniki tədbirlərə xüsusi diqqət yetirirlər. Hazırda bağ sahibləri fındıq bağlarında budama işləri aparır, üzvi və mineral gübrələr verir, həmçinin suvarma işlərini həyata keçirirlər.
