Builki mövsümdə Qax rayonunun təsərrüfatlarında 450 hektar sahədə tütün əkini proqnozlaşdırılır. Fermerlər cari təsərrüfat ilində 430 hektar sahədə "Virciniya botaniki", 20 hektarda isə digər növ tütün yetişdirəcəklər. Bir neçə gündür təsərrüfatlarda istixana şəraitində yetişdirilmiş tütün şitillərinin sahələrə köçürülməsinə başlanılıb. Torpaq mülkiyyətçiləri ilk günlər 20 hektardan çox sahəyə tütün şitilləri köçürüblər.
AZƏRTAC-ın məlumatına görə, bu barədə Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimov məlumat verib.
Qurum rəsmisi bildirib ki, builki mövsümdə rayonun təsərrüfatlarında "Azərtütün" ASC tərəfindən 73,8 hektar, "TES AGRO" şirkəti tərəfindən 150 hektar, "Zaqatala AGRO İndustry" MMC tərəfindən 40 hektar, fərdi istehsalçılar tərəfindən isə 186,2 hektar sahədə tütün əkilməsi nəzərdə tutulur. Tütün şitillərinin yetişdirilməsi üçün istehsalçılar tərəfindən 6,7 min kvadratmetr sahədə istixanalar hazırlanıb.
