Azərbaycan Prezidenti İlham Əliyev martın 23-də Şamaxı rayonunda "Şirvan Aqro" heyvandarlıq kompleksinin açılışında iştirak edib.
Shimal.News məlumat verir ki, 100 hektara yaxın ərazini əhatə edən kompleks ölkə əhalisinin ət və süd məhsulları ilə təminatını yaxşılaşdırmaq, ixrac imkanlarını genişləndirmək və regionda məşğulluğu artırmaq məqsədi daşıyır. Müəssisədə ümumilikdə 9000 baş heyvanın saxlanılması üçün şərait yaradılıb.
Ən müasir texnologiyalarla təchiz olunan kompleksdə süni intellekt əsaslı idarəetmə sistemi tətbiq olunur və alternativ enerji mənbələrindən istifadə edilir. Layihə çərçivəsində 200-dən çox yerli sakin işlə təmin olunub.
Prezident İlham Əliyev müəssisənin kənd təsərrüfatının inkişafı, idxaldan asılılığın azaldılması və ixrac potensialının artırılması baxımından mühüm əhəmiyyət daşıdığını bildirib.
Qeyd edək ki, kompleks həm Azərbaycanın, həm də regionun ən iri heyvandarlıq müəssisələrindən biri hesab olunur.
