Xudat şəhərində fəaliyyət göstərən "APİAZ" MMC-nin bal istehsalı müəssisəsində baxış keçirilib.
Shimal.News xəbər verir ki, Xaçmaz Rayon İcra Hakimiyyətinin başçısı Elnur Rzayev və Azərbaycan Respublikası Prezidentinin Administrasiyasının məsul əməkdaşı Habil Əzəmmədov müəssisədə istehsal prosesi, yaradılmış şərait və məhsul çeşidləri ilə tanış olublar.
Müəssisə rəhbərliyinin verdiyi məlumata görə, hazırda "APİAZ" MMC-də illik bal istehsalının həcmi 50 ton təşkil edir. Dövlət Proqramının emal sənayesinin şaxələndirilməsi və idxalı əvəz edən məhsulların istehsalı ilə bağlı hədəflərinə uyğun olaraq, müəssisənin fəaliyyətinin genişləndirilməsi nəzərdə tutulur.
Yaxın perspektivdə burada balın təkrar emalı hesabına bioloji fəal qida əlavələrinin, təbii tərkibli spreylərin və orqanik kosmetik məhsulların istehsalına başlanılması planlaşdırılır.
Baxış zamanı sahibkarın müraciət və təklifləri dinlənilib, müəssisənin gələcək inkişaf planları ətrafında fikir mübadiləsi aparılıb. Yeni istehsal sahələrinin yaradılması və sahibkarlıq fəaliyyətinin genişləndirilməsi üçün dövlət dəstəyinin vacibliyi qeyd edilib.
Müəssisənin rəhbəri ölkədə yaradılmış əlverişli biznes mühitinə, sahibkarlara göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya dərin minnətdarlığını bildirib.
Qeyd edək ki, "APİAZ" MMC-nin fəaliyyətinin genişləndirilməsi və yeni məhsul növlərinin istehsalına başlanılması "2026-2030-cu illər üçün Dövlət Proqramı"nın rayon üzrə prioritet istiqamətlərindən olan emal potensialının artırılmasına, kənd təsərrüfatı məhsullarına daxili tələbatın ödənilməsinə və qeyri-neft ixracının stimullaşdırılmasına xidmət edəcək.
