Oğuz rayonunda Qarabağ müharibəsi veteranı Qüdrət Xasməmmədov icarəyə götürdüyü torpaq sahəsi ilə bağlı çətinliklə üzləşib.
Yeniavaz.com-un məlumatına görə, veteran 2019-cu ildə Bucaq kənd bələdiyyəsindən 20 hektar əkin sahəsini 49 illik müddətə icarəyə götürüb və illərlə həmin torpağı əkərək dövlət subsidiyası alıb.
Lakin veteran iddia edir ki, sənədlər yenilənərkən torpağın təyinatı gözlənilmədən dəyişdirilib və "əkin sahəsi" "örüş" kimi rəsmiləşdirilib. Bu isə onun subsidiya almaq hüququnu ləğv edib.
"Torpağım əkin sahəsi kimi göstərilmişdi. Təyinatı dəyişdirib, məni subsidiya almaqdan məhrum etdilər. İndi həmin sahəni əkməyə də icazə verilmir", - deyə Qüdrət Xasməmmədov şikayət edib.
Əmlak Məsələləri Dövlət Xidməti məsələ ilə bağlı bildirir ki, problem 2010-cu ildə baş verən texniki səhvdən qaynaqlanıb. O zaman torpaq reyestrə səhvən "əkin sahəsi" kimi daxil edilib. 2019-cu ildə çıxarış rəsmiləşdirilərkən bu səhv düzəldilib və torpağın təyinatı yenidən "örüş sahəsi" kimi qeyd olunub.
Qurumun məlumatına görə, vətəndaş torpağın təyinatını dəyişdirmək istəyirsə, bunun üçün Xidmətə elektron qaydada müraciət etməlidir.
