İsmayıllı rayonunda 1970-ci ildə dövlət qeydiyyatına alınana Nikitin adına kolxoz adını və təşkilati-hüquqi formasını dəyişir.
İqtisadiyyat.az-ın məlumatına görə, təsərrüfat "İvanovka Aqropark" Açıq Səhmdar Cəmiyyətinə çevrildiyini elan edib.
Kolxozun qanuni təmsilçisi Vasiliy Uryupin İvanoviçdir. Hüquqi ünvan isə İvanovka kəndidir.
Sözügedən təsərrüfat Kalinin adına kolxoz kimi 1936-cı ildə yaradılıb. 1953-cü ildən 1994-cü ilə kimi kolxoza Nikolay Vasilyeviç Nikitin rəhbərlik edib. Onun böyük uğurları dövlət tərəfindən qiymətləndirilərək Sosialist Əməyi Qəhrəmanı kimi yüksək ada layiq görülüb.
Azərbaycanda 1996-cı ildən başlanan aqrar islahatlar zamanı İvanovka kəndinin rus icması ümummilli lider Heydər Əliyevə müraciət edərək kolxoz quruluşunun saxlanmasını xahiş ediblər. Ümummilli lider icmanın müraciətini nəzərə alaraq kolxozun saxlanmasını və kolxoza həmin təsərrüfata 41 il rəhbərlik etmiş Nikolay Vasilyeviç Nikitinin adının verilməsinə razılıq verib.
Kolxoz bitkiçilik (buğda, arpa, noxud, günəbaxan, tərəvəz, üzüm) və heyvandarlıq (iribuynuzlu, xırdabuynuzlu, donuzçuluq, quşçuluq) istiqaməti üzrə fəaliyyət göstərir.
