Ötən dövrdə Quba rayonunda 2,3 minədək şəxs üçün özünüməşğulluq proqramı çərçivəsində kiçik təsərrüfatlar yaradılıb.
Shimal.News xəbər verir ki, Əmək və əhalinin sosial müdafiəsi naziri Sahil Babayev və Qubanın icra başçısı İlqar Mahmudov rayon sakinləri - müharibə veteranı Mətləb Əskərəli oğlu Muradov və Sevda İlqar qızı Gülməmmədova üçün qurulmuş kiçik təsərrüfatlara baxış keçiriblər.
Biznes planlarına uyğun olaraq M.Muradov avtoelektrik xidmətləri, S.Gülməmmədova isə un məmulatları istehsalı üzrə aktivlərlə təmin olunaraq kiçik təsərrüfatlarını qurublar.
Hər iki proqram iştirakçısı verilmiş aktivlərdən düzgün faydalanaraq kiçik bizneslərini genişləndirməyə çalışdıqlarını qeyd ediblər. Onlar işsiz və işaxtaran şəxslərin məşğulluğunun təminatı, həmçinin təsərrüfatlarını qurmaları üçün göstərilən dəstəyə görə dövlətimizin başçısına təşəkkürlərini bildiriblər.
