İsmayıllı rayonunun məşhur İvanovka kəndi son dövrlər daşınmaz əmlak bazarında ən çox maraq görən yaşayış məntəqələrindən birinə çevrilib.
Əsas əhalisi molokanlardan ibarət olan kənd təmiz havası, özünəməxsus memarlıq üslubu, təbiəti və Bakı şəhərinə yaxın məsafədə yerləşməsi ilə diqqət çəkir. Bu isə kənddə həm istirahət evi, həm də daimi yaşayış üçün ev almaq istəyənlərin sayını artırıb.
Olke.az-ın məlumatına görə, hazırda İvanovkada ev qiymətləri torpaq sahəsi, təmir vəziyyəti və turizm məqsədilə istifadəyə yararlılığına görə dəyişir.
Belə ki, kənddə köhnə və təmirsiz evlər 25-55 min manat aralığında təklif olunur. Məsələn, 11 sot torpaq sahəsində yerləşən təmirsiz bağ evi 25 min manata satışa çıxarılıb.
Orta təmirli və yaşayış üçün hazır evlərin qiyməti isə əsasən 70-110 min manat arasında dəyişir. 8 sot torpaq sahəsində yerləşən 2 otaqlı həyət evi 70 min manata, 30 sot ərazidə yerləşən 2 mərtəbəli ev isə 110 min manata satışa təqdim olunub.
Son aylarda isə kənddə yeni tikili və turizm məqsədilə istifadə edilə bilən evlərin qiymətlərində ciddi artım müşahidə olunur. 2026-cı ildə yayımlanan elanlardan birində 12 sot torpaq sahəsində yerləşən 4 otaqlı həyət evi 130 min manata təklif edilib.
Əmlak bazarı üzrə mütəxəssislər bildirirlər ki, qiymət artımının əsas səbəblərindən biri kənd turizminin sürətli inkişafıdır. Bölgəyə xüsusilə həftəsonu istirahəti üçün gələnlərin sayı artıb. Kəndin rus-molokan memarlığı, sakit atmosferi və təbiəti sosial şəbəkələrdə də tez-tez müzakirə olunur.
Hazırda İvanovkada satışa çıxarılan daşınmaz əmlakların böyük hissəsini həyət və bağ evləri təşkil edir. Ekspertlər hesab edirlər ki, turizm axını bu templə davam edərsə, yaxın illərdə kənddə torpaq və ev qiymətləri daha da yüksələcək.
