Qax Damazlıq İpəkçilik Stansiyasında kümçülərə ipəkqurdunun paylanması prosesinə start verilib. Məlumata görə, stansiyada iki gün ərzində ölkənin 36 rayonundan olan kümçülərə ipəkqurdu toxumu paylanacaq.
Azərtac-ın məlumatına görə, stansiyanın direktoru Əkrəm Fətəliyev bildirib ki, builki mövsümdə respublikanın 40 rayonunda, eləcə də Naxçıvan Muxtar Respublikasının rayonlarında barama yetişdirilməsi nəzərdə tutulur.
Direktorun sözlərinə görə, bu il Çindən Azərbaycana 6040 qutu hibrid ipəkqurdu sənaye toxumu gətirilib. Bundan əlavə, Qax Damazlıq İpəkçilik Stansiyasında yerli istehsal hesabına daha 451 qutu hibrid sənaye tut ipəkqurdu toxumu hazırlanıb. Beləliklə, ümumilikdə kümçülərə 6491 qutu ipəkqurdu toxumunun əvəzsiz paylanması planlaşdırılır.
Qeyd olunub ki, ipəkqurdu toxumunun inkubasiyası yalnız Qaxda deyil, həmçinin Zərdab rayonu və Zaqatala rayonundakı baramaqurutma müəssisələrində də həyata keçirilib. Zərdabda 800, Zaqatalada isə 450 qutu toxum inkubasiyaya qoyulub. Naxçıvana isə 50 qutu ipəkqurdu toxumu göndərilib.
İpəkqurdunun paylanması prosesi rayon icra hakimiyyətləri, Dövlət Aqrar İnkişaf Mərkəzləri və Azəripək ASCnin nümayəndələrinin iştirakı ilə həyata keçirilir.
Füzuli rayonu İcra Hakimiyyəti başçısının müavini Vüqar Teymurov bildirib ki, builki mövsümdə rayon üzrə 200 qutu, yəni 3 kiloqram 800 qram ipəkqurdu toxumu paylanacaq. Onun sözlərinə görə, rayonda 80-dək kümçü ailəsi ipəkqurdu bəsləyəcək və cari mövsümdə 8 ton yaş barama istehsalı proqnozlaşdırılır. Ötən il isə rayonda 7 ton 252 kiloqram yaş barama istehsal olunub.
Bərdə rayonu İcra Hakimiyyətinin nümayəndəsi Damət Ələkbərov isə qeyd edib ki, stansiyada paylanma prosesi yüksək səviyyədə təşkil olunub. Bildirilib ki, bu il Bərdə rayonuna 400 qutu ipəkqurdu toxumu ayrılıb və rayonda 16 ton yaş barama istehsalı hədəflənir.
Ümumilikdə, ilkin mərhələdə Lənkəran rayonu, Astara rayonu, Bərdə rayonu, Füzuli rayonu, Sabirabad rayonu, Samux rayonu və Zəngilan rayonundan olan kümçülərə 1070 qutu ipəkqurdu toxumu paylanıb.
