İsmayıllı qadınları “Kənd yerlərində qadınların sahibkarlıq fəaliyyəti” adlı layihənin 2-ci mərhələsində iştirak ediblər. Bu haqda ShimalNews 22 iyul tarixində məlumat verir.
Tədbir “Qadın və Müasir Dünya” Sosial Xeyriyyə Mərkəzi İB Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə baş tutub.
Bu zaman bildirilib ki, kənd qadınları üçün regional Biznes Resurs Mərkəzlərinin yaradılması vacibliyi dövlət qurumlarının diqqət mərkəzində olmalıdır. Qadınlar üçün mərkəzlərdə “Mühasibat uçotunun əsasları”, “Maliyyə bacarıqları və ailə büdcəsinin tənzimlənməsi”, “Qadın sahibkarlıq təşkilatlarının potensialının dəstəklənməsi”, “Kompüter bacarıqları”, “Biznes plan nədir”, “Kənd qadınlarının məlumat və xidmətlərə çıxış imkanlarının artırılması” üzrə təlimlər və kurslar təşkil edilməlidir.
Bu mərkəzlər ölkənin bütün kənd yerlərində iqtisadi fəal qadınlar arasında pilot layihə kimi başlanmalı və onların məqsədi kənd qadınlarının şəbəkələşməsini dəstəkləmək və biznes və sosial imkanlarını genişləndirməyə kömək olmalıdır.
Layihənin məqsədi kənd və kənd yerlərində yaşayan qadınların və gənclərin iqtisadi həyatda fəal iştirak etmələri, sahibkarlıq və bacarıqların inkişaf etdirilməsi üçün iqtisadi imkanların genişləndirilməsidir.
