Aqrar Sığorta Fondu Xaçmaz və Xızı rayonlarında fəaliyyət göstərən fermerlərə müxtəlif hadisələr nəticəsində dəyən zərərlərə görə sığorta ödənişləri edib.
Shimal.News xəbər verir ki, Xaçmaz rayonunun Qalağan kənd sakini Əsəd Nəsrullayevin buğda sahəsinə sel-subasma nəticəsində ziyan dəyib.
Fermer 33,5 hektar buğda sahəsini sığortalayıb və hər hektar üçün 8,3 manat olmaqla sığorta haqqı ödəyib. Təbii hadisə nəticəsində 6,8 hektar əkin sahəsinə zərər dəyib. Qiymətləndirmədən sonra fermerə 5 642 manat sığorta ödənişi həyata keçirilib.
Məlumata görə, zərər dəymiş 6,7 hektar sahənin sığortalanmasına cəmi 56 manat xərclənib. Beləliklə, fermer ödədiyi sığorta haqqından təxminən 100 dəfə artıq məbləğdə ödəniş alıb.
Qeyd edək ki, Aqrar Sığorta Fondu eyni zamanda Xızı rayonunda da yoluxucu xəstəlik səbəbindən tələf olan iki baş iribuynuzlu heyvana görə fermerə 7 200 manat sığorta ödənişi edib.
Fonddan bildirilib ki, aqrar sığorta vasitəsilə əkin sahələri və heyvandarlıq təsərrüfatları təbii fəlakətlər, xəstəliklər və digər risklərdən sığortalana bilər. İndiyədək ölkə üzrə fermerlərə ümumilikdə 23 milyon manat sığorta ödənişi həyata keçirilib.
