Şəki rayonu ərazisində yerləşən Əyriçay su anbarının ikinci mərhələsinin inşası və bərpası yenidən gündəmə gəlib.
AZƏRTAC-ın məlumatına görə, həcminə görə bölgədə Şəmkirçay su anbarı və Viləşçay su anbarından sonra üçüncü ən iri su tutarı hesab olunan Əyriçay su anbarı ölkədə həyata keçirilən ilk böyük hidrotexniki layihələrdən biri sayılır.
Məlumata görə, layihənin tikintisi 40 il əvvəl iki mərhələdə nəzərdə tutulsa da, indiyədək yalnız birinci mərhələ tamamlanıb. Hazırda isə su ehtiyatlarına artan tələbat və bölgədəki suvarma problemləri layihənin davam etdirilməsini zəruri edib.
Şəki Su Meliorasiya Sistemlərinin İstismarı İdarəsinin baş mühəndisi Nüsrət İsrafilov bildirib ki, layihənin əsas məqsədi Şəki və Qax rayonlarında əkin sahələrinin suvarma suyu ilə təmin olunmasıdır.
Qeyd olunub ki, su anbarı Qudula, Babaratma, Qaradağlı və Küdürlü kəndlərinin ümumilikdə 1200 hektarlıq ərazisini əhatə edir. Lakin dağ çaylarının gətirdiyi lil qatının artması səbəbindən suyun axınında ciddi problemlər yaranıb.
Mütəxəssislərin hesablamalarına görə, Şin çayı, Kiş çayı və Əyriçaydan qidalanan su anbarına il ərzində təxminən 1 milyon 300 min kubmetr lil yığılır. Bu isə anbarın faydalı həcmini əhəmiyyətli dərəcədə azaldır.
Bildirilir ki, müəyyən tədbirlər görüldüyü təqdirdə anbarın su tutumu iki dəfə artırıla və bununla da 18 min hektara yaxın ərazi suvarma suyu ilə təmin oluna bilər.
Baş mühəndisin sözlərinə görə, artıq layihə sənədləri hazırlanaraq yekunlaşdırılıb və yaxın vaxtlarda tikinti-quraşdırma işlərinə başlanılması planlaşdırılır.
Vurğulanıb ki, layihənin həyata keçirilməsi yalnız kənd təsərrüfatının inkişafına deyil, həm də Ağyazı ərazisində fəaliyyət göstərən aqroparkın su təminatının yaxşılaşdırılmasına, istehsal sahələrinin genişləndirilməsinə və yanğınlarla mübarizədə operativliyə mühüm töhfə verəcək.
