Dövlət tərəfindən kənd təsərrüfatının əsas istiqamətlərindən biri olan üzümçülüyün inkişafı üçün dəstək mexanizmi həyata keçirilir.
Aqrar Subsidiya Şurasının qərarına əsasən, bu il sentyabrın 1-dən 2025-ci il mayın 31-dək salınacaq üzüm bağlarının hər hektarına görə fermerlərə 8 min manat əkin subsidiyası ödəniləcək.
Shimal.News xəbər verir ki, 8 min manat birdəfəlik əkin subsidiyası Dağlıq Şirvan iqtisadi rayonlarında texniki üzüm sortlarından olan tinglərin əkildiyi, sahəsi azı 2 ha olan, “Aqrar sığorta haqqında” Azərbaycan Respublikasının Qanununa müvafiq olaraq sığortalanmış üzüm bağlarına görə ödəniləcək.
Aqrar Subsidiya Şurasının qərarına əsasən, 2021-ci ilin sentyabrından bu ilin sentyabrına kimi salınmış üzüm bağlarının hər hektarına görə 700 manat əkin subsidiyasının ödənilməsi nəzərdə tutulur.
2021-ci ilin sentyabrından əvvəlki tarixlərdə salınmış bağlara görə isə fermerlərə hər hektara 250 manat subsidiya ödəniləcək.
Yeni üzüm bağlarının salınmasının subsidiyalaşdırılması fermerlərin bağların salınmasına çəkdiyi xərcin bir hissəsinin dövlət tərəfindən qarşılanması deməkdir və bu dövlət dəstəyi mexanizmi ölkədə üzüm bağlarının sahəsinin genişlənməsinə əhəmiyyətli təsir göstərəcək.
