Xaçmaz, Şabran, İsmayıllı, Qax, Qəbələ, Şəki, Zaqatala və Balakən də daxil olmaqla bir sıra rayonlarda biçin yekunlaşmaq üzrədir. Mövsümünün qızğın çağı olmasına baxmayaraq, buğda və arpanın qiymətində enmə müşahidə olunmur.
Sakinlərin Shimal.News-a danışdığına görə, əvvəlki illərdə biçin vaxtı bazarda qiymətlər aşağı düşürdü. Lakin bu il vəziyyət fərqlidir. Hazırda 1 kiloqram buğda 46–50 qəpiyə, arpa 40–45 qəpiyə, qarğıdalı isə 70 qəpiyə satılır.
Ən çox müzakirə olunan məqam isə odur ki, bu qiymətlər qış aylarında satılan məhsulların qiyməti ilə demək olar eynidir. Sakinlər sual edirlər: "Biçin mövsümündə qiymətlər enmirsə, bəs qışda nə qədər olacaq?"
Onların iddiasına görə, vasitəçilər buğdanı fermerlərdən əkin sahələrində təxminən 35 qəpiyə alsalar da, sonradan xeyli baha qiymətə satışa çıxarırlar.
Maraqlıdır ki, Kənd Təsərrüfatı Nazirliyinin son məlumatına əsasən, artıq ölkə üzrə payızlıq taxıl sahələrinin 92 faizində biçin başa çatıb. Məhsuldarlıq ötən illə müqayisədə artaraq həcmi 3 milyon tondan çox olub.
Məhsuldarlığın artmasına və biçin mövsümünün son mərhələyə çatmasına baxmayaraq, bazarda qiymətlərin dəyişməməsi alıcıların narazılığına səbəb olur. Sakinlər hesab edirlər ki, qiymətlərin formalaşması ilə bağlı aidiyyəti qurumlar tərəfindən aydın izahat verilməlidir.
