Ramazan və Novruz bayramları ilə əlaqədar ölkədə bir neçə gün qeyri-iş günü olacaq. Bu müddətdə həm yerli sakinlər, həm də Azərbaycana gələn əcnəbi turistlər istirahət üçün bölgələrə üz tuturlar.
Milli.az-ın məlumatına görə, Azərbaycan Qiymətləndiricilər Cəmiyyətinin sədri Vüqar Oruc bildirib ki, bu səbəbdən regionlarda gündəlik kirayə verilən evlərin, hotellərin və koteclərin qiymətlərində artım müşahidə olunur.
Onun sözlərinə görə, qiymət artımı əsasən bölgələrə turist axınının çoxalması ilə bağlıdır.
"Xüsusilə quru sərhədlərin bağlı qalması ölkə daxilində səyahət edənlərin sayını artırır və nəticədə regionlarda yerləşdirmə xidmətlərinə tələbat yüksəlir. Son illərdə bölgələrdə turizmin inkişafı da bu prosesə əlavə təkan verir. Bayram və istirahət günlərində qiymətlər orta hesabla 25–75 faiz aralığında artır. Qiymətlər kirayə evlərin, hotellərin və koteclərin komfort səviyyəsindən, eləcə də yerləşdiyi ərazidən asılı olaraq dəyişir".
V.Oruc qeyd edib ki, vətəndaşlar istirahət üçün daha çox İsmayıllı, Qəbələ, Şəki, Quba, Qusar, Xaçmaz, Zaqatala və Balakən rayonlarına, həmçinin işğaldan azad edilmiş ərazilərə və cənub bölgəsinə üstünlük verirlər.
Onun sözlərinə görə, son 5 ilin dinamikası qiymətlərin nəzərəçarpacaq dərəcədə artdığını göstərir.
"Gündəlik kirayə verilən evlərin qiyməti təxminən 2,5 dəfə, bəzi ərazilərdə isə 3–3,5 dəfə artıb. Hotellərdə isə qiymətlər orta hesabla 1–1,5 dəfə yüksəlib. Turistlərin ən çox üz tutduğu rayonlardan biri Qəbələdir. Adi günlərdə burada gündəlik kirayə evlərin qiyməti 50–150 manat olduğu halda, bayram günlərində 150–300 manat aralığında təklif olunur. Bəzi villalarda qiymət 300 manatdan da yüksək olur".
O əlavə edib ki, Qubada qiymətlər Qəbələ ilə müqayisədə təxminən 30 faiz daha ucuzdur. Adi günlərdə burada kirayə evlərin qiyməti 50–100 manat, bayram günlərində isə 80–200 manat civarında dəyişir.
Qusar və Xaçmaz rayonlarında adi günlərdə qiymətlər 70–100 manat, bayram günlərində isə 100–200 manat aralığında olur.
Şəki–Zaqatala bölgəsində isə qiymətlər nisbətən daha münasibdir. Bu ərazilərdə adi günlərdə gündəlik kirayə evlərin qiyməti 50–100 manat, bayram günlərində isə 70–150 manat arasında dəyişir.
Ekspert bildirib ki, işğaldan azad edilmiş ərazilərdə turizm bazarı yeni formalaşdığı üçün burada qiymətlər Şahdağ Turizm Mərkəzi və Qəbələ kimi populyar turizm istiqamətləri ilə müqayisə edilir. Bu da həmin bölgələrdə turizm infrastrukturu inkişaf etdikcə qiymətlərin formalaşma prosesinin davam etdiyini göstərir.
