Quba Rayon Mərkəzi Xəstəxanasında əməkhaqlarının gecikməsi ilə bağlı narazılıq yenidən gündəmə gəlib. Xəstəxananın əməkdaşları bildirirlər ki, mart ayının 10-u olmasına baxmayaraq, təxminən 1500-ə yaxın işçi hələ də fevral ayının maaşını ala bilməyib.
Shimal.News-a daxil olan məlumata görə, ötən ilin noyabr ayında müəsissənin baş mühasibi Elşən Babayev vəzifəsindən azad edilib. Onun külli miqdarda vəsaiti mənimsəməkdə şübhəli bilindiyi iddia olunur. Gecikmələrin də həmin dövrdən başladığı bildirilir.
Əmək müqaviləsinə əsasən maaşlar ən geci hər ayın 10-dək ödənilməlidir. Lakin gecikmələr bitmir. İşçilər bildirirlər ki, digər müəssisələrdə Novruz bayramı və Ramazan ayı ilə əlaqədar maaşların daha tez ödənilməsinə çalışıldığı halda, Quba RMX-də vəziyyət əksinədir.
"Bayram qabağı insanlar evinə bazarlıq edib. Biz isə hələ fevralın maaşını ala bilməmişik", – deyə əməkdaşlar narazılıqlarını bildiriblər.
İşçilər iddia edirlər ki, mövcud heyət maaş hesablamalarını vaxtında həyata keçirə bilmir. Baş mühasib vəzifədən ayrılıb və hazırda bu posta yeni namizədin təsdiqlənməsi gözlənilir. Buna baxmayaraq, müəssisədə baş mühasibdən əlavə daha altı mühasibin çalışdığı qeyd olunur.
"Rəhbərlikdən dəqiq izah verilmir. Hərə bir söz deyir, "bu yaxınlarda olacaq" deyirlər, amma konkret vaxt deyən yoxdur. İnsanların kredit borcları var, ödəyə bilmirik", – deyə məlumatda bildirib.
Xatırladaq ki, bundan əvvəl də xəstəxanada maaşların gecikməsi ilə bağlı narazılıqlar yaşanmışdı. Hazırkı vəziyyət isə xəstəxanada çalışan yüzlərlə əməkdaşın sosial durumuna ciddi təsir göstərir.
Ümid edirik müvafiq qurum müdaxilə edəcək və problem qısa zamanda həll olunacaq.
