Siyəzəndə Ümummilli Lider Heydər Əliyevin anadan olmasının 103-cü ildönümünə və "Şəhərsalma və Memarlıq İli"nə həsr olunan minifutbol üzrə rayon birinciliyinə start verilib.
Shimal.News xəbər verir ki, yarışda rayonun müxtəlif müəssisə və təşkilatlarını təmsil edən 17 komanda iştirak edir. Komandalar dörd qrupda mübarizə aparacaq, qrup mərhələsini ilk iki pillədə başa vuran kollektivlər yarımfinala yüksələcək.
Turnirin açılış mərasimində Siyəzən Rayon İcra Hakimiyyətinin başçısı Novruz Novruzov və Quba-Xaçmaz Regional Gənclər və İdman İdarəsinin rəisi Qumru Məmmədova çıxış edərək ölkədə idmanın inkişafından və minifutbolun qazandığı uğurlardan danışıblar. Çıxışlarda Azərbaycan millisinin Slovakiyada keçirilən son Avropa çempionatında qazandığı çempionluq da vurğulanıb.
Yarışın rəmzi startını şəhid Elnur Qafarovun oğlu Pərviz Qafarov topa ilk toxunuş etməklə verib.
Təxminən bir ay davam edəcək turnirin qalibi iyulun 10-da keçiriləcək final oyunundan sonra müəyyənləşəcək. Qalib və mükafatçılar təşkilatçılar tərəfindən təltif olunacaqlar.
