Siyəzəndə Ümummilli lider Heydər Əliyevin anım gününə həsr olunmuş 2008-2010-cu il təvəllüdlü oğlanlar və qızlar arasında 3x3 basketbol üzrə rayon birinciliyi keçirilib.
Shimal.News xəbər verir ki, yarışda rayon tam orta məktəblərinin 9 komandası mübarizə aparıb.
Yarış gənclərin vətənpərvərlik hisslərinin yüksəldilməsi, basketbol idman növünün Siyəzən rayonunda inkişaf etdirilməsi və bu idman növünə marağın artırılması, gənclərin fiziki sağlamlıqlarının qorunması və möhkəmləndirilməsi, həmçinin asudə vaxtlarının səmərəli təşkil olunması məqsədi daşıyıb.
Gərgin idman mübarizəsi şəraitində keçən birinciliyin oyunlarının nəticəsinə əsasən oğlanlar arasında şəhər 1 nömrəli tam orta məktəbin komandası I, Zarat kənd tam orta məktəbin komandası II və şəhər 2 nömrəli tam orta məktəbin komandası III yeri tutub.
Qızların yarışında isə şəhər 2 nömrəli tam orta məktəbin “Zirvə” və “Zəfər” komandaları I və II yerləri bölüşüblər. Şəhər 3 nömrəli tam orta məktəbin “Qarabağ” komandası isə III olub.
Qalib komandalar Quba-Xaçmaz Regional Gənclər və İdman İdarəsinin təsis etdiyi diplom və medallar ilə təltif olunublar.
