İkinci liqada 10 oyundur qələbə qazanan “Şahdağ Qusar” zirvədə qərarlaşıb.
Football-plus.аz-ın məlumatına görə, buna baxmayaraq komandanın baş məşqçisi Elnur Abdullayev tam razı deyil.
Komandanın çempionata böyük hədəflərlə başladığını deyə E.Abdullayev, istəklərinin çempionluq və birinci liqada oynamaq olduğunu qeyd edib: “Bunun üçün əlimizdən gələni edirik. 10 oyunda 10 qələbə yaxşıdır, yetərli nəticə deyil. Çempion olmaq üçün durmadan çalışmalıyıq. Biz komanda şəklində bütün rəqiblərə hörmətlə yanaşırıq. Hər oyuna final kimi yanaşırıq. Çempionluğa oynayan, əsas rəqiblərimizdən biri "Şəfa" da məğlub olmur, bizdən 2 xal geridədir. "Şimal" da yaxşı heyətə malik komandadır. Ümidvaram ki, sonda sevinən tərəf biz olarıq. Dekabrın 9-da ağır oyunumuz var. İki tur sonra Şamaxıda "Şəfa"nı qəbul edəcəyik. İkinci dövrə bundan da çətin olacaq. Bizi narahat edən məqamlardan biri meydançalarla bağlıdır. Ot örtükləri çox bərbaddır. Ümid edirəm ki, nə vaxtsa daha yaxşı meydançalar olacaq və daha baxımlı oyunlar izləyəcəyik. Hazırda komandamdakı hər futbolçudan razıyam. Verilən tapşırıqları düzgün yerinə yetirirlər. İstədiyim futbolu oynayırlar ki, nəticə də göz qabağındadır. Transfer məsələsinə gəlincə, bir-iki oyunçu əlavə etsək, kifayətdir. Maliyyə baxımından da problemimiz yoxdur. Rəhbərlik tərəfindən bütün şərait yaradılıb. Qalır başladığımız işi yaxşı tamamlamaq”.
