“Şahdağ Qusar”ın yaşamasına mane olan səbəblər aradan qaldırılır. AFFA-nın ayırdığı büdcə ilə çıxış edəcək şimallılar klubun prezidenti vəzifəsinə Rahid Əmirquliyevi təyin ediblər. Bu da o deməkdir ki, 36 yaşlı Rahid həm meydanda, həm də rəhbərlik səviyyəsində komandanın lideri olacaq.
Bəs bu qərar necə, kim tərəfindən verilib? Əvvəldən belə olacağı bilinirdimi? Həmçinin komandanın baş məşqçisi Elnur Abdullayevlə Əmirquliyevin funksiyaları üst-üstə düşməyəcək ki?
Futbol-plus.az-ın məlumatına görə Rahid Əmirquliyev sualları belə cavablayaıb.
“Xeyr, belə söhbət yoxdur. Komandanın problemləri oldu. Hələ də sponsor yoxdu. Klubumuzun yaşaması üçün məsuliyyəti öz üzərimə götürdüm. Büdcə problemimiz var, yeganə maliyyə AFFA-nın ayırdığı məbləğdir. Bu büdcə ilə komandanı qurmuşuq, yola çıxacağıq.
Sonrakı məsələlərə də yaxınlarda aydınlıq gələcək. Bütün danışıqlarda olan, dəstəyini bizdən əsirgəməyən Futbolun İnkişaf Fondunun (FİF) rəhbəri Tural Piriyevə də minnətdarlığımı bildirirəm. Hər gün yanımızdadır. Onun köməyi ilə 1-ci liqada çıxış edəcəyik.
Elnur Abdullayevlə aramda heç bir problem ola bilməz. Bir-birimizi çoxdan tanıyırıq. Elnurun klubda öz işi var, mənim öz işim. O, baş məşqçi kimi meydandakı qərarlarını verəcək. O nə deyəcəksə, elə də olacaq. Siz fikirləşirsiniz ki, həm futbolçuyam, həm də prezidentəm deyə...
Qərarlar Elnur müəllimə məxsusdur. Kimin oynayıb-oynamaması da onun qərarı ilə rellaşacaq. Elnur məsləhət görsə, oynayaram, məsləhət görməsə, ehtiyat oyunçular skamyasında oturub komandamı dəstəkləyərəm. Meydana çıxan 11 nəfərin qərarı Elnur müəllimə məxsusdur. Onunla aramda heç bir problem ola bilməz, bu mümkün deyil”.
