Dövlət Sərhəd Xidmətinin (DSX) “Lənkəran” sərhəd dəstəsində “Sərhəd” hərbi-idman oyununun yekunlaşması münasibətilə təntənəli tədbir keçirilib.
Shimal.News xəbər verir ki, tədbirdə DSX, Elm və Təhsil Nazirliyi, eləcə də Gənclər və İdman Nazirliyinin rəsmiləri qalib komandaları təbrik ediblər.
Azərbaycan Sərhəd Mühafizəsinin 106-cı ildönümünə həsr olunan və üç mərhələdə keçirilən yarışlarda 45 rayondan 165 məktəbin 825 şagirdi iştirak edib. İlk iki mərhələnin yekunlarına görə, 11 komanda aprelin 28-dən mayın 5-dək final mərhələsində mübarizələrini davam etdirib. Komandalar “Sərhəd pozucusunun yaхalanması və təхliyə edilməsi”, “Ləpirçilik”, “Sərhəd naryadı tərəfindən nəqliyyat vasitəsinə baхışın keçirilməsi”, “Maskalanma”, “Yaralılara yardımın göstərilməsi və təхliyə olunması”, “Avtomatın sökülməsi və yığılması”, “Sıra hazırlığı”, “Tək əsgərin döyüşdə hərəkət üsulu” və “Hərbiləşdirilmiş estafet” üzrə bilik və bacarıqlarını göstəriblər.
Hərbi-idman oyununun keçirildiyi günlərdə məktəblilər sərhədçilərin xidməti və məişət şəraiti ilə tanış olub, onlar üçün bir sıra maraqlı ekskursiyalar təşkil edilib, çoxsaylı mədəni-kütləvi tədbirlər, bilik və idman yarışları keçirilib.
Final mərhələsinin yekunlarına görə Cəlilabad rayonunun “Ləkin” komandası birinci, Qusar rayonunun “Zeyxur” komandası ikinci, Mingəçevir şəhərinin “Qartal” komandası isə üçüncü yeri tutub.
Sonda qaliblərə kubok, medal, diplom və qiymətli hədiyyələr, oyunlarda fəal iştirak edən komandalara isə həvəsləndirici mükafatlar təqdim edilib, xatirə fotoşəkilləri çəkdirilib.
