Qusarda “Qızlar futzal kuboku” turniri keçirilib. Bu haqda ShimalNews 17 aprel tarixində Azərbaycan Futbol Federasiyaları Assosiasiyasına istinadən (AFFA) məlumat verir.
Turnirin ilk günü qızlardan ibarət 12 komanda arasında qrup mərhələsi üzrə 12 oyun keçirilib. Növbəti gün isə pley-off mərhələsinin oyunlarına yekun vurulub. Hil kənd tam orta məktəbi turnirin qalibi, Gədəzeyxur kənd tam orta məktəbi 2-ci, Bədişqala kənd tam orta məktəbi isə 3-cü yerin sahibi olub.
Gədəzeyxur kənd tam orta məktəbin şagirdi Güləndər Mehdiyeva 8 qolla turnirin ən məhsuldar oyunçusu olub. Bədişqala kənd tam orta məktəbin şagirdi Cəhanə Qədimova ən yaxşı oyunçu, Hil kənd tam orta məktəbin şagirdi Amaliya Bəyova isə turnirin ən yaxşı qapıçısı seçilib. İlk üç yeri tutan komandalar diplom və medallar, qalib komanda isə kubokla mükafatlandırılıb. Mükafatları AFFA-nın Qadın Futbolu Departamentinin rəisi Əminə Həsənova, 17 yaşadək qızlardan ibarət milli komandanın baş məşqçisi Nərgiz Qurbanova və 15 yaşadək qızlardan ibarət millinin baş məşqçisi Xanlar Əliyev təqdim edib.
“Qızlar futzal kuboku”nun təşkil edilməsində məqsəd orta məktəb şagirdləri arasında sağlam həyat tərzinin düzgün şəkildə təbliği, futbola marağın artırılması, həmçinin gələcəkdə qızlar futzal liqasının yaradılmasıdır.
