Azərbaycan II Liqasında çıxış edən “Hypers Guba”nın sabiq baş məşqçisi Zaur Hidayətov AFFA İntizam Komitəsinin komandaya verdiyi texniki məğlubiyyətə görə rəhbərliyi günahlandırıb.
Mütəxəssis “Report”a açıqlamasında XI turda “Dinamo” ilə oyunda adı protokolda olmayan futbolçunun meydana çıxmasına və bu səbəbdən komandanın cəzalanmasına görə rəhbərliyin məsuliyyət daşıdığını söyləyib.
O, protokolu, ümumiyyətlə, görmədiyini bildirib:
“Protokol işinə baş məşqçi baxmır. Açığı, protokolu, ümumiyyətlə, görməmişəm. Mən, sadəcə, heyəti yazıb göndərmişdim. Protokol rəhbərlik tərəfindən kompüter vasitəsilə doldurulur. Siyahıya həmin futbolçunun da adını yazmışdım. Amma onu əlavə etməyi unudublar. Komandada cəmi 13-14 nəfər var. Çox adam yoxdur ki, səhv edəsən. Heyəti göndərmişəm, özləri doldurublar”.
Qeyd edək ki, Quba təmsilçisinə Azərbaycan I Liqasının XI turunda “Dinamo” (1:4) ilə oyunda adı protokolda olmayan futbolçu Nail Təhməzlinin meydana buraxılmasına görə matçdakı hesab saxlanılmaqla texniki məğlubiyyət verilib. Zaur Hidayətov bu görüşdən sonra istefa verib.
