"Şahdağ Qusar"ın futbolçusu Rahid Əmirquliyev açıqlama verib. Bu barədə ShimalNews 2 fevral tarixində “FutbolPress”ə istinadən məlumat verir.
"Komandanın gec toplanmasına baxmayaraq, çempionatın ilk dövrəsini ikinci bitirməyi bacardıq. İkinci dövrənin hazırlıqlarına başlamışıq. Məqsədimiz çempion olmaqdır. Buna görə də məşqlərə ciddi yanaşırıq. Heyətimizə yeni oyunçular cəlb olunacaq. Gözləyirik ki, liqa başlasın, çıxışımızı göstərək. Hazırda heç bir çətinliyimiz yoxdur. Rəhbərlik bütün şəraiti yaradıb. Əvvəldən nə söz vermişdilərsə, onu da yerinə yetirirlər", - deyə bölgə təmsilçisi bildirib.
II Liqada mübarizə aparan "Şahdağ Qusar" 14 turdan sonra 30 xalla turnir cədvəlində ikinci sırada qərarlaşıb. R.Əmirquliyev hələ fəaliyyətni bitirmək istəmədiyini də söyləyir:
"Karyeramı bitirmişdim, amma komanda II Liqaya çıxanda sevindim, çünki karyerama orda başlamışdım. Çalışacam ki, burada çempionluq yaşayım. I Liqaya çıxdıqdan sonra isə karyeram haqda düşünəcəm. Alınsa, futbolçu kimi kömək edəcəyəm. Alınmasa da, məşqçi kimi, azarkeş olaraq da hər zaman "Şahdağ Qusar"ın yanındayam".
Rahid karyerası ərzində daha əvvəl "Xəzər Lənkəran", "Qarabağ", "Səbail" kimi komandalarda çıxış edib. O, Azərbaycan yığmasında 48 oyunda 3 qol vurub.
