Fövqəladə Hallar Nazirliyinin (FHN) Mülki Müdafiə Qoşunlarında sərbəst güləş üzrə birincilik keçirilib.
Shimal.News xəbər verir ki, yarış Azərbaycan Respublikasının Dövlət Himninin səsləndirilməsi ilə başlayıb. Tədbirdə Ümummilli Lider Heydər Əliyevin, eləcə də ölkəmizin suverenliyi və ərazi bütövlüyü uğrunda şəhid olan qəhrəmanların xatirəsi bir dəqiqəlik sükutla yad edilib.
Daha sonra güləş yarışlarına start verilib. FHN Mülki Müdafiə Qoşunlarının komandanlığının Fiziki Hazırlıq və İdman şöbəsinin zabitlərindən ibarət hakim heyətinin idarəçiliyi ilə keçirilən birincilikdə 8 çəki dərəcəsi üzrə 81 idmançı mübarizə aparıb.
Yarışın yekununda komanda hesabında birinci yer Gəncə şəhərində yerləşən “N” saylı hərbi hissəyə, ikinci yer Şirvan şəhərindəki “N” saylı hərbi hissəyə, üçüncü yer isə Qəbələ şəhərindəki “N” saylı hərbi hissəyə qismət olub.
Qaliblər kubok, medal və fəxri fərmanlarla təltif olunublar.
