Qadın güləşi üzrə milli komandanın məşqçisi Həsrət Məmmədyarov vəfat edib.
Bununla bağlı Azərbaycan Güləş Federasiyası paylaşım edib.
Həsrət Məmmədyarov 1 fevral 1959-cu ildə Ağsu rayonunda anadan olub. Uşaq yaşlarından sərbəst güləşlə məşğul olmağa başlayıb və idmançı kimi uğurlu karyera qurub. O, dəfələrlə SSRİ və Azərbaycan çempionatlarının qalibi, SSRİ Silahlı Qüvvələrinin çempionu olub. Veteranlar arasında isə üçqat dünya çempionu titulunu qazanıb.
Məmmədyarov 2008-ci ildən etibarən əvvəlcə sərbəst güləş, daha sonra isə qadın güləşi üzrə müxtəlif yaş qruplarından ibarət milli komandaların məşqçisi kimi fəaliyyət göstərib.
Onun uzun illər davam edən məşqçilik fəaliyyəti dövründə Azərbaycan güləşçiləri dünya və Avropa çempionatlarında, eləcə də Olimpiya Oyunlarında müxtəlif əyarlı medallar qazanıblar.
Həsrət Məmmədyarov Azərbaycan güləşinin inkişafına uzun illər ərzində böyük töhfələr verib. Peşəkarlığı, zəngin təcrübəsi və yetirmələrinə qayğısı ilə seçilib.
Səmərəli fəaliyyətinə görə "Əməkdar məşqçi" fəxri adına layiq görülüb və Azərbaycan Respublikasının Prezidenti tərəfindən "Tərəqqi" medalı ilə təltif olunub.
Azərbaycan Güləş Federasiyasının kollektivi Həsrət Məmmədyarovun vəfatından kədərləndiyini bildirərək mərhumun ailə üzvlərinə, yaxınlarına və bütün güləş ictimaiyyətinə dərin hüznlə başsağlığı verib.
