Abşeron rayonunda ər-arvad arasında baş verən mübahisə ilə bağlı cinayət işi açılıb.
Xaçmaz rayon sakini, 1998-ci il təvəllüdlü Sahib (ad şərtidir - red.) ailə münaqişəsi zəminində həyat yoldaşı Xumarla (ad şərtidir - red.) yaşadıqları evdə mübahisə edib.
Belə ki, gecə saatlarında evə gec gələn Sahib həyat yoldaşının iradları ilə qarşılaşıb. Bu zaman tərəflər arasında mübahisə yaranıb. Sahib əsəbiləşərək həyat yoldaşına əl və yumruq zərbələri ilə sifət, baş və bədəninin müxtəlif nahiyələrindən xəsarətlər yetirib.
Sahibə Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə ittiham elan edilib.
İş üzrə ifadə verən Sahib özünü təqsirli bilib. O, Xumarla 2019-cu ildə ailə qurduğunu və birgə nikahdan dörd azyaşlı övladlarının olduğunu bildirib.
"Əvvəllər Xumarla münasibətimiz normal olub. Lakin son zamanlar evə gec gəldiyimə görə Xumar mənə irad bildirdiyindən aramızda ailədaxili sözlü mübahisələr baş verib", - deyə o qeyd edib.
"Mübahisə zamanı əsəbiləşərək Xumarın üzərinə getdim və əl və yumruq zərbələri ilə onun sifətinə, başına, həmçinin bədəninin digər nahiyələrinə vurdum. Sonra gedib yatdım. Daha sonra Xumar barəmdə polisə şikayət etdi", - deyə Sahib ifadəsində göstərib.
Abşeron Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən, Sahib cinayət məsuliyyətindən azad edilib və cinayət işi üzrə icraata xitam verilib.
Mənbə: Demokrat.аz
