Babadilim piri Qubanın Hapıtlu kəndində yerləşir. Ehtimal edilir ki, pir X-XI əsrlərdə inşa edilib və o zaman sufilik mərkəzi kimi fəaliyyət göstərib. Yerli əhalinin sözlərinə görə, keçmişdə burada ağ geyimli möminlər, övliyalar yaşayıblar.
Ziyarətgahı, həmçinin “Xalça piri” də adlandırırlar. Buna səbəb isə buraya nəzir qismində, əsasən, xalçaların gətirilməsidir. Xalq arasında pirə “Dil açan pir” də deyilir.
Ziyarətgah daşlardan hörülüb və kiçik hasarla əhatə olunur. Pirin qırmızı damı var. Ziyarətgahın içərisində iki övliyanın qəbri yerləşir. Binanın divarının çöl tərəfində müxtəlif dövrlərdə ərəbcə yazılmış daş kitabələr var.
Birinci kitabədə də belə yazı var: “Allahdan başqa Allah yoxdur. Məhəmməd Onun elçisidir. Bu mübarək zaviyə binası tikilmişdir. Əzəmətli şeyxlərin şeyxi Şeyx Kamil və Şeyxzadə və Şeyx Mir Hacı və Şeyx Səid və Şeyx Cami və Şeyx Tahir və Şeyx Camal və Şeyx Rəhim və Şeyx Ağa, Mir Məhəmməd və Şeyx Səid və Şeyx Şirzad”.
İkinci kitabədə belə söylənilir: “Allahdan başqa Allah yoxdur. Məhəmməd Allahın Peyğəmbəridir, Əli Allahın köməkçisidir. Bu binanı möhkəmlənmiş, qalibiyyətli, zəfərli şah Səfiəddinin (hakimiyyəti) dövrünün əvvəllərində Soltan Fərrux tikdirmişdir”.
Üçüncü kitabədə: “Qarqiçay və Kükcə Badkuinin səyi və ustadlığı ilə min otuz səkkizinci il tarixdə (1623-1624)”. - sözləri yazılıb.
Dördüncü kitabədə belə bir yazı həkk edilib: “Şeyx Arif Nurunun oğlu ibn Məhəmməd bağışlanmış, vahid Allaha inanan Fətəlixan… Allah onun hökmranlığını əbədiləşdirsin!... ustadları Cəfər və şamaxılı Haşim”.
Ziyarətgahın ərazisində qədim qəbiristanlıq da var.
İstinad edilən mənbələr:
