Bu gün 27 Sentyabr - Anım Günüdür, həmçinin Vətən müharibəsinin başlamasından 5 il ötür.
Vətən müharibəsinin ilk günündə şəhid olan şimallı hərbçilərimizin siyahısını təqdim edirik.
Elvin Qədirov
Elvin Azər oğlu Qədirov 2001-ci il mayın 5-də Zaqatala rayonunun Yeni Suvagil kəndində anadan olub. O, 2019-cu ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin “N” saylı hərbi hissəsində xidmət edib.
Elvin Qədirov sentyabrın 27-də Ağdam döyüşləri zamanı şəhid olub. Zaqatala rayonunun Yeni Suvagil kəndində torpağa tapşırılıb. Prezident İlham Əliyevin Sərəncamına əsasən, Elvin Qədirov ölümündən sonra "Vətən uğrunda" medalı ilə təltif edilib.
Rza Məmmədov
Rza Məmmədov 2001-ci il noyabrın 23-də Şamaxı rayonunun Göylər kəndində anadan olub.
Azərbaycan Silahlı Qüvvələrinin əsgəri olan Rza Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzulinin azadlığı uğrunda gedən döyüşlərdə iştirak edib. O, döyüşlərdə hərbi həkim kimi fəaliyyət göstərirdi. Rza Məmmədov sentyabrın 27-də Füzuli döyüşləri zamanı şəhid olub. Şamaxı rayonunun Göylər kəndində torpağa tapşırılıb.
Azərbaycan Prezidenti İlham Əliyevin Sərəncamına əsasən Rza Məmmədov ölümündən sonra "Füzulinin azad olunmasına görə", “Vətən uğrunda” Hərbi xidmətlərə görə medalı ilə təltif edilib.
Fərid Əliyev
Əliyev Fərid Hamlet oğlu 22 mart 2001-ci ildə İsmayıllı şəhər Kürdmaşı kəndində anadan olub.
Azərbaycan Ordusunun əsgəri olan Fərid Əliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzuli uğrunda gedən döyüşlərdə qəhrəmancasına vuruşaraq şəhid olub. Fərid Əliyev sentyabrın 28-də doğulduğu İsmayıllı rayonunun Kürdmaşı kəndində dəfn olunub.
Fərid Əliyev ölümündən sonra "Vətən uğrunda" “Füzulinin azad olunmasına görə “, “Vətənə xidmətə görə” medalı ilə təltif edilib.
Vidadi Allahverdiyev
Vidadi Allahverdiyev 1988-ci il martın 13-də Xızı rayonunun Giləzi qəsəbəsində anadan olub. Azərbaycan Ordusunun kiçik çavuşu olan Vidadi Allahverdiyev Vətən müharibəsi zamanı Suqovuşanın azadlığı uğrunda gedən döyüşlərdə vuruşub.
O, sentyabrın 27-də Suqovuşan döyüşləri zamanı şəhid olub. Xızı rayonunun Giləzi qəsəbəsində dəfn edilib.
Vidadi Allahverdiyev ölümündən sonra "Vətən uğrunda" medalı ilə təltif edilib.
