44 günlük Vətən Müharibəsində Quba 49 şəhid verib, 196 qubalı yaralanaraq qazi olub, 4 nəfər də "Vətən Müharibəsi Qəhrəmanı" adına layiq görülüb. Gedəndə “mütləq qayıdacağam, hər şey yaxşı olacaq, darıxmayın” deyib, sonra vədinə xilaf çıxan oğulların heç biri Vətəninə, yurduna, el-obasına, bayrağına xilaf çıxmadı. Arxalarında buraxdıqları ailələrini, balalarını, ana və atalarını, yar-yoldaşlarını gözü yaşlı qoysalar da, Vətəni dardan qurtarıb düşmənə dar ağacı qurdular, işğalçını məhşər ayağına çəkdilər. Onlardan biri də qubalı Ruslan Bayramovdur. Ruslan 1995-ci ilin 5 oktyabr tarixində Qubanın Əlibəyqışlaq kəndində anadan olub. Uşaqlıq arzusu hərbçi olmaq olduğu üçün Cəmşid Naxçıvanski adına hərbi liseydə təhsil aldıqdan sonra Heydər Əliyev adına Azərbaycan Ali Hərbi Məktəbini də bitirib. Ali Hərbi Məktəbi bitirdikdən sonra 2019-cu ildə ailə həyatı quran Ruslan bundan sonra Naxçıvan Muxtar Respublikasının “N saylı” Hərbi hissəsində xidmət göstərməyə başlayır. Bununla yanaşı o, Naxçıvan Xüsusi Təyinatlılarının kursunu müvəffəqiyyətlə başa vurur.
Azərbaycan Ordusunda kəşfiyyatçı olan Ruslan sentyabrın 27-də başlayan Vətən Müharibəsində Xüsusi Təyinatlı Qüvvələrin tərkibində döyüşlərə qatılıb. Hadrutun və Xocavənd ətrafındakı yüksəkliklərin alınmasında iştirak edib. Döyüşlərin birində komandiri yaralandığı üçün tağıma rəhbərlik edib. Təkbaşına düşmənin 100-ə yaxın canlı qüvvəsini, 63 texnikasını sıradan çıxarıb. Döyüşlər zamanı Ruslanın içində olduğu avtomobil qəzaya uğrayır. Yaralanmasına və kontuziya almasına baxmayaraq, o, hospitala getməkdən imtina edir, qrupu başsız qoya bilməyəcəyini deyir. Göstərdiyi şücaətlərə görə elə döyüşdəcə ona Baş Leytenant rütbəsi verilir. Müharibəyə gəldiyi ilk günlərdən onun çantasında iki ədəd Azərbaycan Respublikasının bayrağı var idi. Ruslanın arzusu bu bayraqları Şuşaya sancmaq idi. Sonuncu dəfə ailəsi ilə 23 oktyabr 2020-ci ildə danışıb. Salamat olduğunu, hər şeyin yaxşı olacağını deyib. Dünyaya gələn övladına Arzu adını qoysa da, balasının üzünü görə bilməyib. Yoldaşı ona göndərdiyi bağlamaya Arzunun bir cüt corabını qoyub. Ruslan döyüşlərdə olanda qızının corabını cibində gəzdirirmiş.
Rəsmi yazılanlara görə, Ruslan noyabrın 9-u məhz Şuşa uğrunda gedən döyüşlərdə ürəyindən snayper yarası alaraq şəhid olur.
Azərbaycan Prezidentinin Sərəncamına əsasən ölümündən sonra "Vətən uğrunda", “Şuşanın azad olunması uğrunda”, “3-cü dərəcəli Vətənə xidmətə görə”, “Füzulinin azad olunması uğrunda” və “Xocavəndin azad olunmasına görə” medallarıı ilə təltif edilib.
