Bəstəkar Fətullah Rəhimxanov 1924-cü ildə Qusar rayonunun Köhnə Xudat kəndində anadan olub. Onun babası Rəhimxan tanınmış sazəndə idi. Atası İbrahimxəlil isə tar, kamança və zurnada ifa edirdi.
Bəstəkar uşaq ikən atasından tarda və kamançada çalmağı öyrənmişdir. O, orta məktəbi bitirib, Quba pedtexnikumunda, sonradan Bakıda musiqi məktəbində oxumuşdur.
Fətullah Rəhimxanov Quba bölgəsində ilk dəfə ikisəsli xoru yaratmışdır. Bu xor bir neçə dəfə Azərbaycan festivallarının laureatı olmuşdur.
Bəstəkar 1942-1949-cu illərdə A.Bakıxanov adına Quba Dövlət Dram Teatrında səhnəyə qoyulan Azərbaycan yazıçıları N.B.Vəzirovun “Hacı Qənbər”, S.Rəhmanın “Xoşbəxtlər”, S.S.Axundovun “Bayram günü” tamaşalarına, Ləzgi Dövlət Dram Teatrında onlarca tamaşaya musiqi yazıb. Həmin zaman o, uşaqlar üçün mahnılar yazmağa başlayıb.
1960-cı ildə Dağıstan Bəstəkarlar İttifaqının bədii şurası onun 32 mahnısının hamısını qəbul edib. Dağıstan radiosunun qızıl fondunda bəstəkarın onlarca mahnısı saxlanılır.
1966-cı ildə “Azərnəşr” Rəhimxanovun ləzgi şairlərinin sözlərinə bəstələdiyi mahnılardan ibarət “Sazın telləri” adlı kitabını çap edib.
Rəhimxanov Azərbaycan yazıçısı M.İbrahimovun “Kəndçi qızı” pyesini ləzgi dilinə tərcümə etmişdir. Bəstəkar ləzgilərin 79 xalq mahnısını və 23 rəqsini toplayıb nota köçürmüşdür.
Fətullah Rəhimxanov 1999-cu ildə vəfat edib.
Onun ölümündən bir il sonra jurnalist Sədaqət Kərimova Bakının H.Sarabski adına mədəniyyət sarayında Fətullah Rəhimxanovun həyat və yaradıcılığına həsr olunmuş xatirə gecəsi keçirmişdir.
2008-ci ildə bəstəkar Fətullah Rəhimxanovun əməyini qiymətləndirmək məqsədi ilə “Ləzgi xalq mahnıları və rəqsləri” adlı kitab çap olunub. Orada bəstəkarın 1960-1990-cı illərdə topladığı və notlara köçürdüyü ləzgi xalq mahnıları yer alıb.
İstinad edilən mənbələr:
