Yuxarı Qələnxur (qədim Kalunxür) kəndi Qusar rayonunun rayon mərkəzindən təxmini 30 kilometr məsafədə, dağətəyi ərazidə, Qusar maili düzənliyində yerləşir. Hazırki kəndin bünövrəsi 1960-cı illərdə qoyulmuşdur.
“Kalunxür” adı ləzgi dilində “düzənlik yer” mənasını verən “kal” sözündən əmələ gəlmişdir. Bu fikrin həqiqətə uyğun olduğunu kənddə təsadüf edilən “Kalun pel (“Kalun təpəsi”)”, “Kalun rex” (“Kalun yolu”), “Kalun vir” (“Kalun gölü”) toponimləridə sübut edir.
Kəndə əhali yüksəklikdə yerləşən “Pazu” adlı ərazidən köçürülmüşdür və o ərazidə hal-hazırda qədim məscidin dağıntılarından başqa heç nə qalmamışdır. Kəndin Qədim Kalunxür yeri isə hazırda Aşağı Qələnxur kəndinin yuxarısında yerləşən, “Çuru xür” (“Dağılmış kənd”) adlı yerdə olmuşdur. Bu faktı orada yerləşən qədim qəbiristanlıq da sübut edir.
Azərbaycan toponimlərinin ensiklopedik lüğətində qeyd olunub ki, “Qələxür” orta əsrlərə (XIV-XV) aid yaşayış yerinin qalıqlarıdır. O zaman buradan ticarət yolu keçirdi. Lüğətdə kəndin adının “qələ” və “xür” komponentlərindən ibarət olduğu və “qala kəndi”, “qalası olan kənd” mənasını verdiyi yazılıb.
1915-ci ilin “Qafqaz təqvimi”ndə indiki Yuxarı Qələnxur (Kalunxür) kəndi “Геленхур” kimi qeyd olunur və orada 239 nəfərin yaşadığı qeyd olunur. 2009-cu ilin rəsmi məlumatına əsasən, Yuxarı Qələnxurda əhalinin sayı 599 nəfər təşkil edib.
İstinad edilən mənbələr:
○ Azərbaycan Respublikası əhalisinin siyahıyaalınması 2009-cu il. Bakı-2010.
○ Nazim Tapdıqoğlu (Vəlişov). Qusar ensiklopediyası. Bakı-2018.
○ Кавказский календарь на 1915 год. Тифлис-1914.
○ Azərbaycan toponimlərinin ensiklopedik lüğəti. Bakı-2007.
○ Sədaqət Kərimova. Qusar, qusarlılar. Bakı-2011.
