Şabran şəhərində Nizami küçəsindən dəmir yolu vağzalı istiqamətindən Güləmli kəndinə gedən yolda küçə işıqlandırmaları işləmir.
Məsələ ilə bağlı Shimal.News-a danışan sakinlərin sözlərinə görə, yol boyunca quraşdırılmış işıq dirəklərindən yalnız üçü işləyir, qalanları isə uzun müddətdir sıradan çıxıb.
Gecələr sözügedən yolun yalnız bir-iki hissəsində işıq yanır. Digər hissələr isə hərəkətdə olan nəqliyyat vasitələrinin fənərləri olmasa, demək olar ki, tamamilə qaranlıq qalır.
Diqqətçəkən məqamlardan biri də yol kənarında piyada və uşaq keçidləri barədə xəbərdarlıq nişanlarının olmasıdır. Bu da həmin hissədə piyadaların, o cümlədən uşaqların hərəkət etdiyini və onlar üçün real təhlükənin ola biləcəyini göstərir.
Sakinlər bildirirlər ki, qaranlıq yolda sürücülər piyadaları gec görür, piyadalar isə yolun kənarını və çuxurları seçməkdə çətinlik çəkirlər. Xüsusilə payız-qış aylarında havanın tez qaralması vağzaldan kəndə gedib-gələn insanlar üçün təhlükəni artırır. Nəticədə, gecə saatlarında yolda həm piyadalar, həm də sürücülər üçün qəza riski yaranır.
Vətəndaşlar aidiyyəti qurumlardan yol boyunca bütün işıq dirəklərinin yoxlanılmasını və sıradan çıxan işıqlandırma sistemlərinin təmir edilməsini tələb edirlər.
