Xaçmazın İdrisoba, Fərzəlioba və Qusarın Yasaboba kəndlərini birləşdirən yolun vəziyyəti sakinlərin gediş-gəlişini ciddi şəkildə çətinləşdirir.
Shimal.News xəbər verir ki, sözü gedən yol uzun illərdir baxımsız vəziyyətdədir.
Yollarda yaranan iri çuxurlar və gölməçələr nəqliyyatın hərəkətini çətinləşdirib. Sürücülərin sözlərinə görə, bəzi hissələrdə avtomobillərlə təxminən 10 km/saat sürətlə hərəkət etmək mümkündür.
Sakinlərin bildirdiyinə görə, illər əvvəl yola tökülən iri daşlar torpaq qatının yuyulması nəticəsində üzə çıxıb. Yolun bu vəziyyəti nəqliyyat vasitələrinin tez-tez sıradan çıxmasına və əlavə xərcə səbəb olduğu deyilir.
Kənd sakinləri bildirirlər ki, yağışlı havalarda və qış aylarında yol palçıq və gölməçələrlə dolur, yay aylarında isə ərazidə güclü toz yaranır. Kənddaxili yollarda da yağışdan sonra vəziyyətin daha da ağırlaşdığı, piyadaların hərəkətində çətinlik yarandığı qeyd olunur.
Sakinlərin sözlərinə görə, üç kəndi rayon mərkəzi ilə əlaqələndirən yol uzun müddətdir əsaslı təmir olunmayıb.
Yol ətrafında həmçinin fəaliyyət göstərən aqrar təsərrüfatların ağır tonnajlı texnika və yük avtomobillərindən intensiv istifadə etdiyi bildirilir. Bu da yolun vəziyyətinin daha da pisləşməsinə təsir göstərir.
Kənd sakinləri Xudat bələdiyyəsi və Xaçmaz Rayon İcra Hakimiyyətindən yolda təmir və bərpa işlərinin aparılmasını istəyirlər.
