Milli komanda Avropa çempionatının 1-ci təsnifat mərhələsinə Qubada hazırlaşır.
Shimal.News xəbər verir ki, 20 yaşadək qızlardan ibarət Azərbaycan milli komandası EEVZA – Şərqi Avropa Voleybol Zonal Assosiasiyası çempionatına hazırlığı Qubada davam etdirir.
Komanda hazırlıq proqramına uyğun olaraq Qubada, UNEC klubunun idman zalında təlim-məşq toplanışındadır.
Türkiyəli mütəxəssis Gökhan Edmanın rəhbərliyi ilə keçirilən hazırlıq prosesində 20 və 16 yaşadək qızlardan ibarət komandaların üzvləri iştirak edir. Toplanışa ümumilikdə 33 voleybolçu cəlb olunub.
10 günlük Quba toplanışından sonra komandaların oktyabrın 3-də Bakıya qayıtması planlaşdırılır. Daha sonra U-20 millisi hazırlığını ölkə xaricində davam etdirəcək və bir neçə yoxlama oyunu keçirəcək.
U-20 qızlardan ibarət komandalar arasında EEVZA çempionatı 22-25 oktyabrda Gürcüstanın Rustavi şəhərində keçiriləcək.
Yarışda Azərbaycanla yanaşı, Polşa, Latviya, Ermənistan, Ukrayna, Estoniya və Gürcüstan milliləri iştirak edəcək.
Azərbaycan millisi A qrupunda Polşa və Latviya yığmaları ilə qarşılaşacaq. B qrupunda isə Estoniya, Gürcüstan, Ermənistan və Ukrayna komandaları mübarizə aparacaq.
