Şəki Apellyasiya Məhkəməsində xuliqanlıq işi üzrə qərar qəbul olunub.
Shimal.News xəbər verir ki, Şəkinin Kiçik Dəhnə kəndi ərazisində Zahir İmanov (ad və soyad şərtidir) Ə.Məmmədova qarşı nalayiq ifadələr işlədib və daha sonra baş və əlləri ilə onun üzünə və alnına zərbələr endirib.
Hadisə 2024-cü ilin avqustunda "Kəndimiz" kafesinin yaxınlığında baş verib. Zahir İmanov "Mercedes Vito" markalı avtomobillə hərəkətdə olarkən Niyaməddin Hacızadənin (ad və soyad şərtidir) idarə etdiyi "Volkswagen" markalı avtomobillə bağlı aralarında mübahisə yaranıb.
Mübahisə zamanı Ə.Məmmədov tərəfləri sakitləşdirməyə çalışıb. İttihama əsasən, Zahir İmanov ona qarşı nalayiq ifadələr işlədib və daha sonra baş və əlləri ilə onun üzünə və alnına zərbələr endirib.
Zahir İmanov əvvəlcə xuliqanlıq niyyəti ilə sağlamlığa az ağır zərər vurma və xuliqanlıq maddələri ilə ittiham olunub.
Şəki Rayon Məhkəməsi isə sağlamlığa zərər vurma ilə bağlı ittihamı başqa maddə ilə tövsif edib və 2025-ci ildə elan olunmuş amnistiyanı tətbiq edərək Zahir İmanovu cinayət məsuliyyətindən azad edib.
Dövlət ittihamçısı bu qərardan narazı qalaraq apellyasiya protesti verib. Şəki Apellyasiya Məhkəməsi isə protesti təmin etməyib.
Mənbə: Pravda.аz
