Rakif Əliyev 4-cü turun lideri ilə keçiriləcək oyunda heç-heçəni qənaətbəxş nəticə hesab etmir.
"Zaqatala" 1-ci Liqanın 4-cü turunda lider "Şahdağ Qusar"ın qonağı olacaq.
Milli komandaların oyunları ilə əlaqədar yaranan fasilə dövründə sınaq matçı keçirməyən Zaqatala təmsilçisi sentyabrın 30-da keçirilən ikitərəfli oyunla kifayətlənib.
Qarşılaşma öncəsi "Zaqatala"nın baş məşqçisi Rakif Əliyev rəqib barədə fikirlərini bölüşüb.
Baş məşqçi "Şahdağ Qusar"ın oyununu təhlil etdiklərini bildirib:
"Şahdağ Qusar"ın güclü və zəif cəhətlərini özümüz üçün müəyyənləşdirmişik. Hücumda, müdafiədə, keçidlərdə necə oynadıqlarını, standart vəziyyətlərdən necə istifadə etdiklərini bilirik. Futbolçulara da bu barədə məlumat vermişik, necə oynamalı olduqlarını diqqətlərinə çatdırmışıq. Məşqlərimizi davam etdirir, matça səylə hazırlaşırıq".
Rakif Əliyevin sözlərinə görə, Qusar təmsilçisi həm hücumda, həm də müdafiədə bir neçə oyun variantına malikdir:
"Şahdağ Qusar" kombinasiyalı hücumlar etməyi bacaran, istər cinahlardan, istərsə də mərkəzdən uğurlu həmlələr qura bilən kollektivdir. Rəqib bir yox, bir neçə variantda qol axtarışına çıxır. Eyni sözləri müdafiə xətti barədə də deyə bilərəm. Qarşılaşacağımız komandanın müdafiəsi də etibarlıdır. Bütün bunları futbolçulara izah etmişik. Hərçənd necə olacağını zaman göstərəcək".
"Şahdağ Qusar"ın gücünü nəzərə alaraq heç-heçənin yaxşı nəticə sayılıb-sayılmayacağı ilə bağlı suala isə baş məşqçi qələbə hədəfində olduqlarını deyib:
"Hər oyuna qələbə üçün çıxan məşqçilərdənəm. Heç-heçə mənim üçün heç vaxt yaxşı nəticə sayıla bilməz. Bu oyunda da hədəf qələbədir. İnanıram ki, futbolçularımız əllərindən gələni edəcəklər və 3 xal qazanacağıq".
Rakif Əliyev "Şahdağ Qusar"ın heyətində "Karvan-Yevlax"dakı qədər təcrübəli futbolçuların olmadığını, lakin komandanın daha döyüşkən olduğunu bildirib:
"İki döyüşkən kollektivin mübarizəsini izləyəcəyik. Kim daha yaxşı mübarizə aparsa, o da qalib gələcək".
Qeyd edək ki, "Şahdağ Qusar" – "Zaqatala" qarşılaşması oktyabrın 7-də Binə qəsəbə stadionunda keçiriləcək. Oyunun start fiti 15:30-da səsləndiriləcək.
Mənbə: Fanat.аz
