Qəbələ Uşaq Reabilitasiya Mərkəzində yerləşdirilən ukraynalı uşaqlar və gənclər şəhərin tarixi abidələri ilə tanış olublar.
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin təşkilatçılığı ilə Azərbaycana gələn ukraynalı uşaqlar və gənclər Qəbələ Dövlət Tarix-Bədii Qoruğu və Qəbələ Arxeoloji Mərkəzində olublar.
Qonaqlar əvvəlcə Arxeoloji Mərkəzin sərgi salonlarına baxıblar. Onlara ərazidə aparılan qazıntılar zamanı aşkar edilən tarixi və maddi-mədəniyyət nümunələri barədə məlumat verilib.
Daha sonra qonaqlar mərkəzin akt zalında olublar. Burada Qəbələ Arxeoloji Mərkəzinin fəaliyyəti haqqında məlumat verilib. Qeyd olunub ki, mərkəz 2014-cü il sentyabrın 22-də Prezident İlham Əliyevin Qəbələyə səfəri zamanı rəsmi olaraq açılıb.
Tədbir zamanı "Qafqaz Albaniyasının paytaxtı – Qəbələ" filmi nümayiş etdirilib. Ukraynalı uşaqların ifasında Ukraynanın Dövlət Himni səsləndirilib, qonaqlara xatirə hədiyyələri təqdim olunub.
Uşaqlar daha sonra qoruğun Səlbir və Qala arxeoloji ərazilərinə baş çəkiblər. Burada aparılan qazıntılar zamanı aşkar edilmiş ictimai bina qalıqları, təsərrüfat quyuları, ocaq yerləri, su xətləri və digər tarixi tapıntılar barədə məlumat verilib. Qonaqlar həmçinin qədim qala divarlarına baxıblar.
Səfərin sonunda qonaqlar üçün çay süfrəsi təşkil olunub və xatirə şəkilləri çəkilib. Ukraynalı uşaqlar Qəbələ Dövlət Tarix-Bədii Qoruğundan xoş təəssüratlarla ayrılıblar.
Mənbə: Azərtac
