Şabran rayonunun Hacıqaraqaşlı kənd ümumi orta məktəbində şagirdlərin təxminən 60 faizi məktəbə velosipedlə gedib-gəlir.
Məktəbin təşəbbüsü ilə təxminən 2-3 il əvvəl başlayan bu ənənə artıq şagirdlərin gündəlik həyatının bir hissəsinə çevrilib.
Məktəbdə bildirilib ki, şagirdlərin velosipeddən istifadəsinin təşviq edilməsində əsas məqsədlərdən biri onların sağlam və aktiv həyat tərzinə yönləndirilməsi, digər tərəfdən isə vaxta qənaət edilməsidir. Şagirdlərin məktəbə gedib-gələrkən təhlükəsiz yoldan istifadə etməsinə də diqqət yetirilir.
2017-ci ildə istifadəyə verilən modul tipli məktəbdə şagirdlərin velosipedlərini saxlaya bilməsi üçün də şərait yaradılıb.
Hacıqaraqaşlı kənd ümumi orta məktəbi tədris göstəriciləri ilə də fərqlənir. Məktəb monitorinq nəticələrinə əsasən region üzrə 45 məktəb arasında 2-ci yeri tutub.
Mənbə: Azərbaycan müəllimi
