TƏBİB-in işçi heyəti bir neçə gündür Qubadadır və tibbi arayışların verilməsi ilə bağlı araşdırma aparır.
Shimal.News-un əlddə etdiyi məlumata görə, Sumqayıtda tibbi arayışların verilməsi ilə bağlı aparılan araşdırmalardan sonra Quba Rayon Mərkəzi Xəstəxanasında da TƏBİB tərəfindən yoxlamalara başlanılıb. Prosesin oktyabrın 10-dək davam edəcəyi bildirilir.
Araşdırmaya tibbi arayışların verilməsi zamanı ortaya çıxan ciddi nöqsanların aşkarlanması səbəb olub. Hazırda məsələ ilə bağlı araşdırma davam edir, əməkdaşların izahatları alınır və dindirilmələr aparılır.
Sumqayıt Tibb Mərkəzinin tabeliyində fəaliyyət göstərən tibb müəssisələrində tibbi arayışların qısa müddətdə, o cümlədən 20 dəqiqə ərzində verilməsi ilə bağlı araşdırma aparılıb. Nəticədə 13 əməkdaşın əmək müqaviləsinə xitam verildiyi bildirilib. İşdən azad edilənlər arasında üç poliklinikanın baş həkimlərinin də olduğu qeyd olunub.
Quba Rayon Mərkəzi Xəstəxanasındakı araşdırmanın nəticələri və mümkün intizam tədbirləri barədə hələlik məlumat yoxdur.
