Azərbaycan, Qazaxıstan, Özbəkistan və İranın teatr kollektivləri Şəkiyə təşrif buyurublar.
Shimal.News xəbər verir ki, oktyabrın 1-də Şəkidə başlayan V Beynəlxalq Teatr Festivalı ayın 5-dək davam edəcək.Tədbir Mədəniyyət Nazirliyi, Şəki Şəhər İcra Hakimiyyəti, Azərbaycan Teatr Xadimləri İttifaqı və Şəki Dövlət Dram Teatrının dəstəyi ilə keçirilir.
Festivalın ilk günündə xarici ölkələrdən gələn teatr kollektivlərinin qarşılanma mərasimi keçirilib. Qonaqlar daha sonra "Şəki teatrı – dünən və bu gün" adlı sərgi ilə tanış olublar.
Ardınca festivalın mətbuat konfransı keçirilib. Çıxışlarda tədbirin əhəmiyyəti, teatr kollektivləri arasında yaradıcılıq əlaqələrinin genişləndirilməsi və səhnə sənətinin inkişafı barədə danışılıb.
Açılış günündə Şəki Dövlət Dram Teatrı dramaturq Tuncer Cücenoğlunun "Uçqun" əsəri əsasında hazırlanmış eyniadlı tamaşanı təqdim edib. Tamaşanın quruluşunu Əməkdar incəsənət xadimi Mirbala Səlimli verib. Səhnə əsərində insanın daxili qorxu hissinə qalib gəlməsi mövzusu ön plana çəkilir.
Tamaşanın sonunda festivalın təşkilində iştirak edən bir qrup şəxsə təşəkkürnamə və xatirə hədiyyələri təqdim olunub.
Festival çərçivəsində oktyabrın 2-də Qazaxıstan teatrı "Tufan", 3-də Azərbaycan Dövlət Pantomim Teatrı "Şinel", 4-də İranın Ərdəbil Moqan Honar Teatrı "İçimdə bir Araz addımlayır", 5-də isə Özbəkistan Dövlət Gənc Tamaşaçılar Teatrı "Məsxərəboz-Şou" tamaşalarını təqdim edəcək.
