Bu gün şimal rayonlarından olan şəhidlərimiz - Rəşad Səfərəliyev və Musa Nuhiyevin doğum günüdür.
Rəşad Fərman oğlu Səfərəliyev 2001-ci il oktyabrın 2-də Xaçmaz rayonunda anadan olub.
O, 2020-ci il sentyabrın 27-də başlayan Vətən müharibəsində iştirak edib. Rəşad Səfərəliyev sentyabrın 27-də şəhid olub və Xaçmaz rayonunda dəfn edilib.
Rəşad Səfərəliyev ölümündən sonra "Vətən uğrunda", "Suqovuşanın azad olunmasına görə", "Laçının azad olunmasına görə" medalları və 3-cü dərəcəli "Vətənə xidmətə görə" ordeni ilə təltif edilib.
Musa Nüsrət oğlu Nuhiyev 1998-ci il oktyabrın 2-də Zaqatala rayonunun Qımır kəndində anadan olub. 2005-2016-cı illərdə İ.Məmmədov adına Qımır kənd tam orta məktəbində təhsil alıb. Subay olub.
O, 2016-cı ildə müddətli həqiqi hərbi xidmətə çağırılıb. 2016-2018-ci illərdə Azərbaycan Silahlı Qüvvələrinin "N" saylı hərbi hissəsində xidmət edib. 2018-ci ildən həmin hərbi hissədə müddətdən artıq həqiqi hərbi xidmət hərbi qulluqçusu kimi xidmət edib.
2020-ci il sentyabrın 27-də başlayan Vətən müharibəsi zamanı Ağdam istiqamətində gedən döyüşlərdə iştirak edib. Musa Nuhiyev oktyabrın 16-da Ağdam istiqamətində gedən döyüşlərdə döyüş tapşırığını yerinə yetirərkən şəhid olub. O, Zaqatala rayonunun Qımır kəndində dəfn edilib.
Musa Nuhiyev ölümündən sonra "Vətən uğrunda", "Ağdamın azad olunmasına görə" medalları və 3-cü dərəcəli "Vətənə xidmətə görə" ordeni ilə təltif edilib.
