"Əsas məsələ bu son döyüşü qazanmaqdır. Çünki uduzduğun halda UFC-nin səni heyətinə cəlb etməsi çətin olur".
Bunu azərbaycanlı MMA döyüşçüsü Vüqar Kərəmov gələcək karyerası, "Super RIZIN 5" turniri və UFC-yə keçid ehtimalı barədə danışarkən deyib.
34 yaşlı idmançımız dekabrda keçiriləcək "Super RIZIN 5" turnirindəki qarşılaşmanın detallarını və kəmər uğrunda mübarizə şansını dəyərləndirib:
"Yaponiyanın nüfuzlu "Super RIZIN 5" turnirində ilin sonuna qədər döyüş keçirməyimlə bağlı müqaviləm var. Qarşılaşmanın dekabrın sonlarında keçirilməsi planlaşdırılır. Vaxtın az qalmasına baxmayaraq, rəqibim hələ müəyyənləşməyib. Bu döyüşüm kəmər uğrunda olmayacaq. Çünki həmin turnirdə yapon və qırğızıstanlı idmançılar kəmər uğrunda üz-üzə gələcəklər. Mən isə kəmərə namizəd kimi mübarizə aparacam. Yəni qarşılaşmada qalib gəlsəm, növbəti mərhələdə kəmər uğrunda döyüşmək şansı əldə edəcəm".
V.Kərəmov "RIZIN"lə müqavilə bitdikdən sonra başqa təşkilatlardan, xüsusən də UFC-dən gələn təkliflərin nəzərdən keçiriləcəyini vurğulayıb:
"Döyüşdən sonra hansı addımı atacağımız hələ tam bəlli deyil. UFC ilə də danışıqlar aparmışıq. İlk növbədə bu döyüşü qazanmalıyam. Bundan sonra gələn təklifləri dəyərləndirəcəyik. Məsələn, "RIZIN" də bizə daha yaxşı təklif verə bilər. Buna da baxacaq və məsləhətləşəcəyik. Amma çox güman ki, danışıqlar apardığımız təşkilatlar arasında UFC də olacaq. Mənim əsas istəyim də UFC-də çıxış etməkdir. İnşallah, dekabrda keçiriləcək döyüşdən sonra hər şey daha aydın olacaq".
Qeyd edək ki, Vüqar Kərəmov ötən ay "Super RIZIN 5" turniri çərçivəsində 66 kq çəki dərəcəsində yaponiyalı Ryo Takagi ilə qarşılaşıb. Azərbaycan təmsilçisi üç raund davam edən döyüşdə hakimlərin yekdil qərarı ilə qalib gəlib. Hakimlər görüşü 29:28, 30:27, 30:27 hesabları ilə Kərəmovun xeyrinə qiymətləndiriblər.
Xatırladaq ki, Vüqar Kərəmov 2023-cü ildə Mikuru Asakuranı məğlub edərək "RIZIN"in 66 kq çəki dərəcəsində çempionluq kəmərini qazanıb. Həmin il Çihiro Suzukiyə məğlub olaraq titulunu itirib.
Mənbə: İdman.Biz
